കാര്‍ഷിക സര്‍വ്വകലാശാലകള്‍ ആര്‍ക്കുവേണ്ടി?

നവംബര്‍ 26, 2011

ജനിതകവിത്തുകളുടെ ഗവേഷണം ആരംഭിക്കുമെന്ന് കാര്‍ഷിക സര്‍വ്വകലാശാല

തൃശ്ശൂര്‍: ശാസ്ത്രലോകത്തെ പ്രതിഷേധങ്ങളെത്തുടര്‍ന്ന് വിവാദമായ ജനിതകവിത്തുകളുടെ ഗവേഷണം ആരംഭിക്കുമെന്ന് കാര്‍ഷിക സര്‍വ്വകലാശാല. ശനിയാഴ്ച വെള്ളാനിക്കരയില്‍ ചേര്‍ന്ന സര്‍വകലാശാലയുടെ 112-ാമത് ജനറല്‍ കൗണ്‍സില്‍ യോഗത്തിന്റെ അജണ്ടയിലാണ് യൂണിവേഴ്‌സിറ്റിയുടെ ഈ ഔദ്യോഗിക വെളിപ്പെടുത്തല്‍.

12-ാം പഞ്ചവത്സരപദ്ധതി നടപ്പിലാക്കുമ്പോള്‍ ഊന്നല്‍ നല്‍കുമെന്ന് പ്രഖ്യാപിച്ചിട്ടുള്ള 28 വിഭാഗങ്ങളില്‍ ഉള്‍പ്പെടുത്തിയാണ് ജനിതകവിത്തുകള്‍ വികസിപ്പിച്ചെടുക്കാനുള്ള ഗവേഷണം നടത്തുമെന്ന് കാര്‍ഷിക സര്‍വ്വകലാശാല പ്രഖ്യാപിച്ചിരുന്നത്. കാലാവസ്ഥാവ്യതിയാനവും കൃഷിയും, സംയോജിത കൃഷിസമ്പ്രദായം എന്നീ മേഖലകള്‍ക്ക് പന്ത്രണ്ടാം പദ്ധതിയില്‍ ഊന്നല്‍ നല്‍കുമെന്ന് വ്യക്തമാക്കുന്ന ഒന്നാം നമ്പര്‍ ചോദ്യത്തിനുള്ള ഉത്തരത്തിലാണ് സര്‍വകലാശാലാ അധികാരികളുടെ ഈ വെളിപ്പെടുത്തല്‍. More >>>>

പ്രത്യേക ശ്രദ്ധയ്ക്ക്

കാര്‍ഷകരുടെ പ്രശ്നങ്ങള്‍ക്ക് പരിഹാരമാര്‍ഗങ്ങള്‍ കണ്ടെത്തുന്നതിനും അവ പ്രചരിപ്പിക്കുന്നതിനും പകരം കോടികള്‍ പാഴാക്കുന്നതും വരും തലമുറകളെപ്പോലും അപകടത്തിലാക്കുന്നതുമായ ഗവേഷണങ്ങള്‍ക്ക് പിന്നാലെ കാര്‍ഷിക സര്‍വ്വകലാശാലകള്‍ പോകുന്നത് ആരെ സഹായിക്കാനാണ്?  നാളിതുവരെ മനുഷ്യരിലും മറ്റ് ജീവജാലങ്ങളിലും പരിസ്ഥിതിയിലും ജൈവ വൈവിധ്യത്തിനും യാതൊരു കുഴപ്പവും സംഭവിക്കില്ല എന്ന് ഇനിയും ശാസ്ത്രീയമായി തെളിയിക്കപ്പെട്ടിട്ടില്ലാത്ത ജനിതക വിളകള്‍ കേരളംപോലെ അതി ലോലമായ ആവാസവ്യവസ്ഥയും അത്യപൂര്‍വ്വവും അതി വിപുലവുമായ  ജൈവ വൈവിധ്യവുമുള്ള ജന സാന്ദ്രത ഏറിയതുമായ ഒരു ചെറു സംസ്ഥാനത്ത് പരീക്ഷിക്കുന്നത് ആത്മഹത്യാപരമാണ്. മൊന്‍സാന്റോ, സിന്‍ജെന്റാ പോലുള്ള ആഗോള കുത്തകകളുടെ ലക്ഷ്യം ലോകത്തെ മുഴുവന്‍ വിത്തുകളും ലാബുകളില്‍ നിര്‍മ്മിക്കണം എന്നതാകാം. പേറ്റന്റിന്റെ പിന്‍ബലത്തില്‍ ലോക കോടതികളുടെ സഹായവും മൊന്‍സാന്റോയ്ക്ക് ലഭിക്കും. ജനിതകവിള കൃഷിയിടങ്ങള്‍ക്കടുത്തുള്ള കൃഷിയിടങ്ങളിലെ വിളകളില്‍ പരാഗണത്തിലൂടെ ജനിതകമാറ്റം സംഭവിച്ചതിന് അമേരിക്കന്‍ കോടതിയില്‍ കേസ് നടക്കുന്ന കാര്യവും നാം അറിഞ്ഞതല്ലെ? 1955 അടുപ്പിച്ച് ജാപ്പനീസ് കൂട്ടുകൃഷി സമ്പ്രദായപ്രകാരം പതിനാല് സെന്റില്‍ നിന്നും നാല്പത് പറ നെല്ല്  ഉത്പാദനം നടന്നത് കണ്ണുകൊണ്ട് കണ്ട അനുഭവം പലര്‍ക്കും ഉണ്ട്. അക്കാലത്ത് വിളവെടുപ്പ് കൊയ്ത്ത് ഉത്ഘാടനം നടത്തിയ മുഖ്യമന്ത്രി പട്ടം താണുപിള്ള ഉള്‍പ്പെട്ട ഹ്രസ്വചിത്രം തൃശൂര്‍ കാര്‍ഷിക സര്‍വ്വകലാശാലയുടെ ചവറ്റ് കൊട്ടയില്‍ കാണും. കാര്‍ഷികോത്പാദന വര്‍ദ്ധനവിനായി നടത്തിയ ഗവേഷണങ്ങള്‍ മണ്ണിനെ കൊല്ലാനായിരുന്നു എന്ന് കാലം നമ്മെ പഠിപ്പിച്ചു. കാലാവസ്ഥ വ്യതിയാന ഭീഷണികള്‍ ചെറുക്കുന്ന വിത്തിനങ്ങളല്ല കര്‍ഷകര്‍ക്കാവശ്യം ഹരിതഗൃഹ വാതകങ്ങളുടെ നിയന്ത്രണമാണ് വേണ്ടത്. മണ്ണിന്റെ ഗുണ നിലവാരം വര്‍ദ്ധിപ്പിക്കുന്നതിന് പകരം ജനിതകമാറ്റം വരുത്തിയ വിത്തുകളും മറ്റും പരീക്ഷിക്കാന്‍ ഇറങ്ങി പുറപ്പെടും മുമ്പ് ലോകമെമ്പാടും അതിനെ എതിര്‍ക്കുന്നവര്‍ പറയുന്ന കാര്യങ്ങളിലേയ്ക്ക്  ഒരല്പശ്രദ്ധ ചെലുത്തുകയാണ് വേണ്ടത്. കാര്‍ഷിക സര്‍വ്വകലാശാലകള്‍ തന്നെയാണ് തീര്‍ച്ചയായും പരിസ്ഥിതി സംരക്ഷണത്തില്‍ പ്രധാന പങ്ക് വഹിക്കേണ്ടത്. തെങ്ങിന്റെ മഞ്ഞളിപ്പിന് പരിഹാരം തെങ്ങൊന്നിന് അഞ്ച് കിലോ യൂറിയ ഇടാന്‍ നിര്‍ദ്ദേശിച്ച ഡോ. ഗോപിമണിയെ നമുക്ക് മറക്കാന്‍ കഴിയുമോ? കര്‍ഷക ആത്മഹത്യകളുടെ കാരണങ്ങള്‍ പഠിക്കാനും പരിഹാരമാര്‍ഗങ്ങള്‍ നിര്‍ദ്ദേശിക്കാനും പ്രതിനിധി സംഘത്തെ അയക്കുവാന്‍ കേരള കാര്‍ഷിക സര്‍വ്വകലാശാല ജനറല്‍ കൌണ്‍സില്‍ തീരുമാനിച്ചത് ആരെ സംരക്ഷിക്കാനാണ്? കടം കയറുന്ന കര്‍ഷകരുടെ ആത്മഹത്യയ്ക്ക് കാരണം നഷ്ടകൃഷിയാണെന്നതാണ് സത്യം.

അന്‍പത് വര്‍ഷങ്ങള്‍ക്ക് മുമ്പ് തിരുവനന്തപുരം നഗരത്തിലെ ശുചിത്വം കണ്ണുകൊണ്ട് കണ്ട കൃഷിശാസ്ത്രജ്ഞര്‍ പഠിക്കാതെപോയതെന്താണ്? ചാല പാളയം മാര്‍ക്കറ്റ് വേസ്റ്റും, റോഡുകള്‍ തൂത്തുവാരുന്ന ചപ്പ് ചവറുകളും ഉപയോഗിച്ച് വലിയതുറ സീവേജ് ഫാമില്‍ മനുഷ്യവിസര്‍ജ്യവുമായി കലര്‍ത്തി നിര്‍മ്മിച്ച കമ്പോസ്റ്റായിരുന്നു അന്ന് നെല്‍പ്പാടങ്ങളിലും, വെള്ളായണി കാര്‍ഷിക കോളേജിലും, സര്‍ക്കാര്‍ കൃഷിഫാമുകളിലും ഉപയോഗിച്ചിരുന്നത്.  നാല്പത് മേനി വിളവിന് കാരണമായതും പ്രസ്തുത കമ്പോസ്റുതന്നെ. . ജൈവവളത്തില്‍ അടങ്ങിയിരിക്കുന്ന മൈക്രോ മാക്രോ ന്യൂട്രിയന്‍സ് എത്രത്തോളമാണെന്ന് കൃഷിശാസ്ത്രജ്ഞരെ പഠിപ്പിക്കേണ്ടകാര്യമില്ലല്ലോ. ഉല്പാദനം വര്‍ദ്ധിപ്പിക്കാന്‍ ഇന്നും എന്‍.പി.കെ രാസവളം പ്രചരിപ്പിക്കുന്ന ശാസ്ത്രജ്ഞരിലുള്ള വിശ്വാസം തന്നെ കര്‍ഷകര്‍ക്ക് നഷ്ടപ്പെട്ടിരിക്കുന്നു. ഉദാഹരണത്തിന് 0.05 ഉം 0.06 ഉം ശതമാനം നൈട്രജന്‍ ലഭ്യമാക്കുന്ന ജൈവവളങ്ങള്‍ക്ക് പകരം  46 ശതമാനം വീര്യമുള്ള യൂറിയ പോലുള്ള വളങ്ങള്‍ മണ്ണില്‍ വിതറി മണ്ണിരകളെ കൊന്നൊടുക്കുകമാത്രമല്ല വളരെക്കുറച്ച് മാത്രം ചെടികള്‍ വലിച്ചെടുക്കുകയും ബാക്കി മുഴുവനും ഭൂഗര്‍ഭ ജലത്തിലെത്തിച്ച് കുടിവെള്ളമായി ലഭ്യമാക്കുകയല്ലെ ചെയ്തത്. 70% ഒഴുക്കുവെള്ളത്തോടൊപ്പം ജലാശയങ്ങളിലെത്തിച്ചേരും. വെള്ളത്തിലെ അമിത നൈട്രജന്‍ സാന്നിധ്യം നൈട്രേറ്റ് പോയിസണിംഗിന് കാരണമാകുന്നു എന്ന് ലോകം തിരിച്ചറിഞ്ഞുകഴിഞ്ഞു. കാലികളുടെ രക്തത്തില്‍ കടന്ന് മെറ്റ്‌ഹീമോഗ്ലോബിനായി മാറുകയും കാലികളെ ശ്വാസം മുട്ടിച്ച് കൊല്ലുകയും ചെയ്യുന്ന ഗവേഷണം കര്‍ഷകര്‍ക്ക് ഹാനികരം തന്നെയാണ്. മാത്രവുമല്ല ബ്ലൂ ബേബി സിന്‍ഡ്രോം എന്ന ആറുമാസത്തില്‍ താഴെ പ്രായമുള്ള കുട്ടികള്‍ക്കുണ്ടാകുന്ന അസുഖത്തിന് കാരണവും മറ്റൊന്നല്ല.

ജനിതക മാറ്റവുമായി മുന്നോട്ട് പോകുവാനുള്ള കാര്‍ഷിക സര്‍വകലാശാലയുടെ 112-ാമത് ജനറല്‍ കൗണ്‍സില്‍ യോഗത്തിന്റെ അജണ്ട പുനര്‍ ചിന്തനത്തിന് വിധേയമാക്കണം എന്നുമാത്രമേ കര്‍ഷകര്‍ക്ക് പറയുവാനുള്ളു.  കര്‍ഷകര്‍ക്ക്  ബയോഗ്യാസ് സ്ലറി ഡ്രയറിലൂടെ ഡ്രൈ ചെയ്ത് എയറോബിക് കമ്പോസ്റ്റാക്കി മാറ്റുവാന്‍ ഇതേ കാര്‍ഷിക സര്‍വ്വകലാശാലയ്ക്ക് സഹായിക്കാന്‍ കഴിയുമോ? ഇത്തരം ബയോഗ്യാസ് പ്ലാന്റിലൂടെ ഹരിതഗൃഹവാതകമായ മീതൈന്‍ ഇല്ലായ്മ ചെയ്യുവാനും ഗ്രാമങ്ങളും നഗരങ്ങളും മാലിന്യ മുക്തമാക്കുവാനും ജൈവസമ്പുഷ്ടമായ കൃഷിയിടങ്ങള്‍ സംരക്ഷിക്കുവാനും ടെറസ് യാര്‍ഡ് പച്ചക്കറി കൃഷി നടത്തുവാനും കഴിയും.  ഒരു വശത്തുകൂടി ജൈവകൃഷി പ്രോത്സാഹിപ്പിക്കുവാന്‍ സെമിനാറുകള്‍ നടത്തുകയും മറുവശത്തുകൂടി അപകടകരമായ രാസവളങ്ങളും  കീടനാശിനികളും കളനാശിനികളും ഉപയോഗിച്ചുള്ള ജനിതകവിള കൃഷി പരീക്ഷണം നടത്തുന്നതും ഇരട്ടത്താപ്പല്ലെ? വേണം കാലാവസ്ഥ മാറ്റമുണ്ടാക്കാത്ത കൃഷിരീതികള്‍ എന്ന കെ.പി. പ്രഭാകരന്‍ നായരുടെ ലേഖനം കൃഷിശാസ്ത്രജ്ഞര്‍ വായിക്കേണ്ട ഒന്നാണ്. കൂടാതെ ഔഷധഗുണമുള്ള നെല്ലുകളും വിത്തുകളും മറയുന്നു  എന്നതും ശ്രദ്ധേയമായ ഒരു വിഷയമാണ്.

തിരുവനന്തപുരം: കേരളത്തിലെ ഔഷധഗുണമുള്ള നെല്ലിനങ്ങളും തനതുകൃഷിക്ക് ഉപയോഗിച്ചിരുന്ന പല വിത്തിനങ്ങളും കൃഷിയില്‍നിന്നും മനുഷ്യന്റെ ഉപയോഗത്തില്‍നിന്നും അപ്രത്യക്ഷമായതായി ഡോ.എം.എസ്.സ്വാമിനാഥന്‍ നടത്തിയ പഠനത്തില്‍ ചൂണ്ടിക്കാട്ടുന്നു.

വയനാട്ടിലും മറ്റും വ്യാപകമായി കൃഷി ചെയ്തിരുന്ന അരിക്കരൈ, ചെന്നെല്ല്, കുഞ്ഞിനെല്ല്, ജാതിസൂക്കി എന്നീ നെല്ലിനങ്ങളാണ് കാര്‍ഷികമേഖലയില്‍നിന്ന് അപ്രത്യക്ഷമായിരിക്കുന്നത്. ജൈവവൈവിധ്യവും ഭക്ഷ്യസുരക്ഷയുമായി ബന്ധപ്പെടുത്തിയ പഠനത്തിലാണ് കൃഷിശാസ്ത്രജ്ഞനായ ഡോ.സ്വാമിനാഥന്‍ ഇക്കാര്യം പറയുന്നത്.

ഔഷധ നെല്ലിനങ്ങളില്‍ ഇപ്പോള്‍ പ്രചാരത്തിലുള്ള ഏകഇനം നവരമാത്രമാണ്. ആയുര്‍വേദത്തില്‍ നവരക്കിഴിക്ക് ഇത് ഉപയോഗിച്ചുവരുന്നു. പണ്ടുകാലത്ത് തിരുവിതാംകൂറിലെ രാജാക്കന്മാര്‍ നവരനെല്ലിന്റെ അരികൊണ്ടാണ് ഊണ് കഴിച്ചിരുന്നത്.

19 ഇനം ചേനകള്‍ വയനാട്ടിലും മറ്റിടങ്ങളിലും കൃഷി ചെയ്തിരുന്നെങ്കിലും അവ ഇപ്പോള്‍ ലഭ്യമല്ല.

രണ്ടിനം ഇഞ്ചികാച്ചില്‍, രണ്ടിനം കുഴിക്കാവിത്ത്, കി്വന്റല്‍ കാച്ചില്‍, ആനക്കൊമ്പന്‍ കടവുകായന്‍, ഉരുളന്‍ കാച്ചില്‍, കുപ്പത്തൊട്ടിക്കിഴങ്ങ്, എലിവാലന്‍ കാച്ചില്‍, വെട്ടുകിഴങ്ങ്, രണ്ടിന വെള്ളക്കാച്ചില്‍, വെട്ടുകിഴങ്ങ്, ചോരകാച്ചില്‍, ചുവപ്പ്, നീല, കാച്ചിലുകള്‍ എന്നിവയും വെള്ളഇഞ്ചികാച്ചില്‍, മുള്ളന്‍കാച്ചില്‍, ആഫ്രിക്കന്‍ കാച്ചില്‍, തൂണന്‍ കാച്ചില്‍, ഇറച്ചിക്കാച്ചില്‍ എന്നീ കാച്ചിലിനങ്ങള്‍ 2006 വരെ വിപണിയില്‍ ലഭ്യമായിരുന്നു. എന്നാലിന്ന് അഞ്ചിനങ്ങള്‍ മാത്രമാണ് വിപണിയിലെത്തുന്നതെന്ന് ഡോ.സ്വാമിനാഥന്‍ പറയുന്നു.

ഒറീസയില്‍ 3500 നെല്ലിനങ്ങള്‍ കൃഷി ചെയ്തിരുന്നു. ഇപ്പോള്‍ അത് 95 ആയി കുറഞ്ഞിരിക്കുകയാണ്. ഇവയില്‍ തന്നെ ‘കലിംഗ കാളജീര’ എന്നൊരു നെല്ലിനത്തെ വംശനാശത്തില്‍ നിന്നു രക്ഷിച്ച ആദിവാസി സമൂഹത്തിന് യു.എന്‍. അടുത്തിടെ ഇക്വേറ്റ ഇനിഷ്യേറ്റീവ് അവാര്‍ഡ് നല്‍കിയിരുന്നു.

ഒരുനൂറ്റാണ്ട് കൊണ്ട് നഷ്ടമായ നാടന്‍ വിത്തിനങ്ങള്‍ അനേകായിരം വരും. 1930ല്‍ നിത്യോപയോഗത്തിനുള്ള പച്ചക്കറികളുടെ നിരവധി വിത്തിനങ്ങള്‍ കമ്പോളത്തില്‍ പോലും സുലഭമായിരുന്നു. എന്നാല്‍ 50 വര്‍ഷത്തിനുശേഷം 1983ല്‍ കണക്കെടുത്തപ്പോള്‍ നില വളരെ ശോചനീയമായിരുന്നു. 1930ല്‍ കാബേജിന്റെ 544 ഇനങ്ങള്‍, പയറിന്റെ 400, റാഡിഷ് 463, ബീറ്റ്‌റൂട്ട് 288, വെള്ളരിക്ക 385, തക്കാളി 408 എന്ന തരത്തില്‍ വിത്തിനങ്ങള്‍ കൃഷിക്കായി ഉപയോഗിച്ചിരുന്നു. എന്നാല്‍ 1983ല്‍ ദേശീയ വിത്തു സ്റ്റോറേജ് ലബോറട്ടറിയില്‍ പോലും ബീറ്റ്‌റൂട്ടിന്റെ 17, പയറിന്റെ 25, വെള്ളരിക്കയുടെ 16, തക്കാളി 79 എന്ന നിലയില്‍ വിത്തിനങ്ങള്‍ കുറഞ്ഞു.

ജൈവവൈവിധ്യം സംരക്ഷിക്കാന്‍ വാണിജ്യാടിസ്ഥാനത്തില്‍ ബ്രാന്‍ഡുകള്‍ സംരക്ഷിക്കുന്നതുപോലെ ജന്തുജീവജാലങ്ങളെ സംരക്ഷിക്കേണ്ട ആവശ്യകതയിലേക്ക് പഠനം വിരല്‍ചൂണ്ടുന്നു.


അമ്മ ബാലസഭ

മേയ് 9, 2011

മലയിന്‍കീഴ് ഗ്രാമപഞ്ചായത്തില്‍ മണപ്പുറം എന്ന സ്ഥലത്ത് കുറച്ച് പല പ്രായത്തിലുള്ള കൊച്ചു കുട്ടികള്‍ അമ്മ ബാലസഭ എന്ന പേരില്‍ ഒരു കൊച്ച് കൂട്ടായ്മയ്ക്ക്  രൂപം നല്‍കുകയും “ഹരിത കൃഷി ഭൂമി” എന്ന ടെറസിലും വീട്ടുമുറ്റതും പച്ചക്കറി കൃഷിചെയ്യുവാന്‍ പ്രോത്സാഹനവും പരിശീലനവും ലഭ്യമാക്കുവാന്‍ വാര്‍ഡ് മെമ്പര്‍ മുന്‍കൈ എടുത്ത് സംഘടിപ്പിച്ച പരിപാടിയിലേയ്ക്ക് മലയിന്‍കീഴ് കൃഷിഭവനിലെ കൃഷി ഓഫീസര്‍ നിര്‍മ്മല സി ജോര്‍ജ് എന്നെ ക്ഷണിക്കുകയുണ്ടായി.

ഈശ്വരപ്രാര്‍ത്ഥനയോടെ കാര്യപരിപാടികള്‍ ആരംഭിച്ചു. 

 അവിടെ സംസാരിച്ച പഞ്ചായത്ത് മെമ്പര്‍ ശശികുമാറിനോട് എനിക്ക് അല്പം ആദരവ് തോന്നി എന്നത് എടുത്തു പറയേണ്ട കാര്യമാണ്. നെല്‍കൃഷി ചെയ്തതും പരാജയപ്പെട്ടതും ഇപ്പോള്‍ പ്രസ്തുത പാടശേഖരത്തില്‍ നെല്‍കൃഷി പാടെ ഇല്ലാതായതും തുടങ്ങി ശുദ്ധവായു, ജലം, ആഹാരം എന്നിവയെക്കുറിച്ച് നല്ലൊരു വിവരണവും അദ്ദേഹം നല്‍കുകയുണ്ടായി. തുടന്ന് സംസാരിച്ച കൃഷി ഓഫീസര്‍ എപ്രകാരമാണ് മണ്ണ് തയ്യാറാക്കേണ്ടത് എന്നും ജൈവ കൃഷിചെയ്യേണ്ടത് എങ്ങിനെയാണെന്നും ജൈവ കീടനാശിനികള്‍ എപ്രകാരം തയ്യാറാക്കണമെന്നും വിശദീകരിച്ചു. കൃഷിഭവനില്‍ നിന്ന് കൊണ്ടുവന്ന പച്ചക്കറി വിത്തുകളും ജൈവകൃഷിയെപ്പറ്റിയുള്ള ഒരു ചെറിയ പുസ്തകവും കുട്ടികള്‍ക്ക് നല്‍കി.

കൊച്ചുകുട്ടികളില്‍ ടെറസ് കൃഷിയെപ്പറ്റി അറിവ് പകരുന്നതിലേയ്ക്കായി കിസ്സാന്‍ കേരള യൂ ട്യൂബില്‍ പ്രസിദ്ധീകരിച്ച രണ്ട് വീഡിയോകള്‍ ഡൌണ്‍ലോഡ് ചെയ്തത് അവര്‍ക്ക് കാട്ടിക്കൊടുക്കുവാന്‍ എനിക്ക് സാധിച്ചു.

അമ്മബാലസഭയിലെ അംഗങ്ങള്‍ അമ്മമാര്‍ക്കൊപ്പം

ജനഗണമനയോടുകൂടി പ്രസ്തുത പരിപാടി അവസാനിപ്പിച്ചു.


ചുവന്നലേബല്‍ കീടനാശിനി നിരോധനം അപ്രായോഗികം

മേയ് 5, 2011

ബദല്‍ മാര്‍ഗമില്ല; സംസ്ഥാനത്തിന് അധികാരമില്ല


തിരുവനന്തപുരം: എന്‍ഡോസള്‍ഫാന് നിരോധനമേര്‍പ്പെടുത്തിയ പശ്ചാത്തലത്തില്‍, അതീവ വിഷകരമായ ‘ചുവന്ന ലേബലുള്ള കീടനാശിനികള്‍’ ഒന്നാകെ തുടച്ചുനീക്കാനുള്ള സംസ്ഥാന സര്‍ക്കാര്‍ തീരുമാനം പ്രായോഗികമല്ലെന്ന് ചൂണ്ടിക്കാണിക്കപ്പെടുന്നു. കീടനാശിനികള്‍ നിരോധിക്കാന്‍ സംസ്ഥാന സര്‍ക്കാരിന് അധികാരമില്ലെന്നതാണ് ഒരുപ്രശ്‌നം. ബദല്‍ കണ്ടുപിടിയ്ക്കാതെ, വ്യാപകമായി ഉപയോഗിക്കുന്ന കീടനാശിനികള്‍ നിരോധിക്കുന്നത് പതിനായിരക്കണക്കിന് കര്‍ഷകരെ പ്രതിസന്ധിയിലാക്കുകയും ചെയ്യും.

കീടനാശിനികളില്‍ ഏറ്റവും വിഷമുള്ളവയാണ് ചുവന്ന ലേബല്‍ വിഭാഗത്തിലുള്ളത്. ഇവയില്‍ പലതും മാരകമാണ്. എന്നാല്‍ പ്രയോഗക്ഷമതയും ഫലപ്രാപ്തിയും ഇത്തരം കീടനാശിനികളെ കര്‍ഷകര്‍ക്ക് പ്രിയങ്കരമാക്കുന്നു. ഉദാഹരണത്തിന് തടപ്പുഴു, കൊമ്പന്‍ചെല്ലി ആക്രമണങ്ങളെ പ്രതിരോധിയ്ക്കാന്‍ ഉപയോഗിക്കുന്ന ഫ്യൂറിഡാനും ഫോറേറ്റും എല്ലാ വാഴകര്‍ഷകരുടെയും പ്രധാന സഹായിയാണ്. കൂമ്പടപ്പ് / കുറുനാമ്പ് രോഗത്തിനെതിരെയും ഫ്യൂറിഡാന്‍ ഉപയോഗിക്കുന്നു. പകരം മരുന്ന്തരാതെ ഇവ നിരോധിക്കുന്നത് ആത്മഹത്യാപരമാണെന്ന് തിരുവനന്തപുരത്തെ പള്ളിച്ചലില്‍ ഇരുപതേക്കര്‍ സ്ഥലത്ത് ഇരുപതിനായിരത്തോളം വാഴ കൃഷിചെയ്യുന്ന ടി.വാമദേവന്‍ നായര്‍ പറയുന്നു. ”……കൃഷി മാത്രമാണ് എന്റെ വരുമാനം. വേപ്പെണ്ണയും കപ്പലണ്ടിപ്പുണ്ണാക്കുമൊക്കെ ഉപയോഗിച്ച് നിവൃത്തികെടുമ്പോള്‍ മാത്രമാണ് ഈപറയുന്ന കീടനാശിനിയിടുന്നത്. അതും സര്‍ക്കാര്‍ പറയുന്ന അളവിലും കുറച്ചുമാത്രം. ഇതുതന്നെ പ്രയോഗിക്കണമെന്ന് ഞങ്ങള്‍ക്ക് നിര്‍ബന്ധമില്ല. പകരം എന്തെങ്കിലും അവര്‍ തരണം. ഇല്ലെങ്കില്‍ വേപ്പെണ്ണയുടെയൊക്കെ വില കുറയ്ക്കണം. കൂലിയ്ക്ക് ആളെ കിട്ടാത്തതാണ് മറ്റൊരു പ്രശ്‌നം. അഞ്ഞൂറുരൂപ ദിവസക്കൂലി കൊടുത്ത് കളപറയ്ക്കുന്നത് മുതലാകില്ല. പണിക്ക് ആളെ കിട്ടാതെ വരുമ്പോള്‍ കര്‍ഷകര്‍ ലൈപ്പോസ് തളിയ്ക്കും. എല്ലാം ചെയ്തിട്ടും കഴിഞ്ഞവര്‍ഷം കാറ്റുവീഴ്ചയുണ്ടായപ്പോള്‍ ഏഴു ലക്ഷം രൂപയാണ് നഷ്ടമായത്. കീടങ്ങള്‍ക്കെതിരെ എന്തുചെയ്യണമെന്ന് പറഞ്ഞിട്ട് ഇവര്‍ ഇത് നിരോധിച്ചാല്‍ മതിയായിരുന്നു” വാമദേവന്‍ നായര്‍ പറയുന്നു.

ഫ്യൂറിഡാനെപ്പോലെ മാരകമാണ് മീഥൈല്‍ ഡെമറ്റോണ്‍ എന്ന കീടനാശിനി. നീരൂറ്റുന്ന കീടങ്ങള്‍ക്കെതിരെയാണ് ഇതിന്റെ പ്രയോഗം. പച്ചക്കറികളില്‍ വ്യാപകമായി ഡെമറ്റോണ്‍ ഉപയോഗിച്ചുവരുന്നു. കാലാകാലങ്ങളായി കൃഷിവകുപ്പും സര്‍വകലാശാലകളും ഗവേഷണ സ്ഥാപനങ്ങളും എന്‍ഡോസള്‍ഫാനെപ്പോലെ ഡെമറ്റോണിനെയും പ്രോത്സാഹിപ്പിച്ചുവരുന്നു. അത് കര്‍ഷകര്‍ക്കും ശീലമായി. ”… കാന്‍സര്‍ പോലും ഉണ്ടാക്കുന്നതാണ് ഇത്തരം കീടനാശിനികള്‍. ഇവ നിരോധിക്കേണ്ടത് അത്യാവശ്യമാണ്. ഇവയുടെ ഉപയോഗത്തിനെതിരെ ബോധവത്കരണം നടത്തുകയാണ് സര്‍ക്കാര്‍ ആദ്യം ചെയ്യേണ്ടത്. ഒപ്പം ബദല്‍ കീടനാശിനികള്‍ കണ്ടെത്താനുള്ള ശ്രമവും ഗവേഷണവും തുടങ്ങണം. സാധാരണ നിലയ്ക്ക് മൂന്നുവര്‍ഷമെങ്കിലും ഇതിന് ആവശ്യമാണ്. അതൊന്നും ചെയ്യാതെ ഒറ്റയടിയ്ക്ക് കീടനാശിനികള്‍ നിരോധിക്കുന്നത് പ്രഹസനമായി മാറും ……” ഒരു കൃഷി ശാസ്ത്രജ്ഞന്‍ പറഞ്ഞു.

കീടനാശിനികള്‍ അപ്പാടെ നിരോധിക്കാനാണ് കഴിഞ്ഞദിവസം മന്ത്രിയുടെ അധ്യക്ഷതയില്‍ ചേര്‍ന്ന യോഗം തീരുമാനിച്ചത്. മൂന്നുദിവസത്തിനകം ഇതിന്റെ ഉത്തരവിറങ്ങും. എന്നാല്‍ സംസ്ഥാനസര്‍ക്കാരിന് ഇതിനുള്ള അധികാരമില്ലെന്ന് വിദഗ്ദ്ധര്‍ ചൂണ്ടിക്കാട്ടുന്നു. 1968-ലെ ഇന്ത്യന്‍ ഇന്‍സെക്ടിസൈഡ് ആക്ടിലും 1971-ല്‍ രൂപവത്കരിച്ച ഇതിന്റെ ചട്ടത്തിലുമാണ് കീടനാശിനി നിരോധിക്കുന്നതിനെക്കുറിച്ച് പറയുന്നത്. അതനുസരിച്ച് സെന്‍ട്രല്‍ ഇന്‍സെക്ടിസൈഡ് ബോര്‍ഡ് ആന്‍ഡ് രജിസ്‌ട്രേഷന്‍ കമ്മിറ്റി നല്‍കുന്ന നിര്‍ദേശമനുസരിച്ച് കേന്ദ്രസര്‍ക്കാരാണ് ഒരു കീടനാശിനി നിരോധിക്കേണ്ടത്. ഇതിനുള്ള പ്രക്രിയകള്‍ക്ക് മാസങ്ങളെടുക്കും. ആ വഴിയ്ക്കും സര്‍ക്കാര്‍ ഇതുവരെ നീങ്ങിയിട്ടില്ല.

കടപ്പാട് – മാതൃഭൂമി

ഇരുപതേക്കറില്‍ വാഴകൃഷിചെയ്ത്ത് എന്തുമാത്രം ആളുകളെയാണ് ഫുറഡാന്‍ തീറ്റിക്കുന്നത്. ആരോഗ്യമേഖലയിലുണ്ടാകുന്ന പ്രശ്നങ്ങള്‍ക്ക് നമ്മുടെ സര്‍ക്കാര്‍ പ്രൈവറ്റ് ആശുപത്രികള്‍ പരിഹരിക്കുന്നതോടൊപ്പം എത്രപേര്‍ക്കാണ് തൊഴിലും ശമ്പളവും മറ്റ് ആനുകൂല്യങ്ങളും ലഭിക്കുന്നത്. രാജ്യത്തിന്റെ ജി.ഡി.പി ഉയര്‍ത്തിനിറുത്തുന്നതില്‍ ടി. വാമദേവന്‍ നായര്‍ വഹിക്കുന്ന പങ്ക് നിസ്സാരമല്ല. പതിനഞ്ച് ഏക്കര്‍ വരെ മാത്രം ഒരു കര്‍ഷകന് കൃഷിഭൂമി കൈവശം വെയ്ക്കാമെന്നിരിക്കെ ഇരുപതേക്കറില്‍ ഇദ്ദേഹം കൃഷിചെയ്യുന്നത് പാട്ടത്തിനെടുത്തിട്ടാണെന്ന് വ്യക്തം. അപ്പോള്‍ സഹായത്തിന് വേണമെങ്കില്‍ ഫുറഡാന്‍ കമ്പനിയുടെ പ്രതിനിധിയും ഇദ്ദേഹത്തെ നേരിട്ട് വന്ന് കണ്ടെന്നിരിക്കും. കൃഷിമാത്രം വരുമാനമുള്ള ഇദ്ദേഹത്തിനെത്തേടി അവര്‍ഡ് വന്നില്ലെങ്ാകിലേ അതിശയമുള്ളു.

കേന്ദ്ര സര്‍ക്കാരിന്റെ കീഴില്‍ പ്രവര്‍ത്തിക്കുന്ന സെന്‍ട്രല്‍ ഇന്‍സെക്ടിസൈഡ് ബോര്‍ഡ് ആന്‍ഡ് രജിസ്ട്രേഷന്‍ കമ്മറ്റിയ്ക്ക് ഇവയുടെ ഗുണദോഷങ്ങളെപ്പറ്റി അറിയാത്തതുകൊണ്ടല്ല. മറിച്ച് ഇതുകൊണ്ടുണ്ടാകുന്ന നേട്ടം അവര്‍ക്ക് നല്ലപോലറിയാം. ഇതുമൂലമുണ്ടാകുന്ന കാലാവസ്ഥാ വ്യതിയാനത്തിന് പരിഹാരം  നഷ്ടകൃഷികാരണം തരിശ് ഭൂമിയുടെ വിസ്തൃതി വര്‍ദ്ധിക്കുന്നതിലൂടെ പരിഹരിക്കപ്പെടുമായിരിക്കാം.


വേണം കാലാവസ്ഥാ മാറ്റമുണ്ടാക്കാത്ത കൃഷി രീതികള്‍

ജനുവരി 22, 2011

ഡോ. കെ.പി. പ്രഭാകരന്‍ നായര്‍

കഴിഞ്ഞ വര്‍ഷാന്ത്യത്തില്‍ മെക്‌സിക്കോയിലെ കാന്‍കൂണില്‍ നടന്ന കാലാവസ്ഥാ ഉച്ചകോടി പരാജയപ്പെട്ടിരിക്കുന്നു. തൊട്ടുമുമ്പത്തെ വര്‍ഷം ഡെന്‍മാര്‍ക്കിലെ കോപന്‍ഹേഗനില്‍ നടന്ന ഉച്ചകോടിക്കു സംഭവിച്ച അതേ വിധി. കാലാവസ്ഥാ വ്യത്യാസത്തെ നേരിടേണ്ടതെങ്ങനെയെന്നതു സംബന്ധിച്ച സംവാദങ്ങളില്‍ ഗണ്യമായ ഊന്നല്‍ ലഭിക്കുന്നതു കൃഷി മേഖലയ്ക്കാണ്. മനുഷ്യന്റെ നിലനില്‍പ്പിന് ഏറ്റവും ആവശ്യമായിട്ടുള്ള സംഗതി ഭക്ഷണമാണ് എന്നതു തന്നെ കാരണം. കാലാവസ്ഥാ വ്യതിയാനം കാര്‍ഷികോത്പാദനത്തെ എങ്ങനെ ബാധിക്കുമെന്നറിയാന്‍ കേരളത്തിലെയും തമിഴ്‌നാട്ടിലെയും സമീപകാല അനുഭവങ്ങള്‍ പരിശോധിച്ചാല്‍ മതി. ഡിസംബര്‍ ആദ്യ വാരത്തില്‍ കാലംതെറ്റി പെയ്ത മഴ കൊല്ലം ജില്ലയില്‍ ആയിരക്കണക്കിന് ഏക്കര്‍ നെല്‍ക്കൃഷി നശിപ്പിച്ചു. തമിഴ്‌നാട്ടില്‍ മൂന്നു ദിവസത്തിനിടെ 28 സെന്റിമീറ്റര്‍ മഴയാണു രേഖപ്പെടുത്തിയത്. സര്‍വകാല റെക്കോഡാണിത്. മഴ പ്രളയമായി മാറുമ്പോള്‍ കാര്‍ഷികോത്പാദനം താളം തെറ്റുന്നു. പശ്ചിമഘട്ട മേഖലയിലെ ഇക്കഴിഞ്ഞ തെക്കുപടിഞ്ഞാറന്‍ കാലവര്‍ഷത്തിന്റെ കാഠിന്യവുമോര്‍ക്കുക. ഇന്ത്യയിലെ കാലവര്‍ഷത്തിന്റെ ക്രമരാഹിത്യം കാലാവസ്ഥാ വ്യതിയാനത്തിന്റെ ഒന്നാന്തരം ഉദാഹരണമാണ്. കാലാവസ്ഥാ വ്യതിയാനം സംബന്ധിച്ച ഐക്യരാഷ്ട്ര സമിതി (ഇന്റര്‍ ഗവണ്‍മെന്റല്‍ പാനല്‍ ഓണ്‍ ക്ലൈമറ്റ് ചെയ്ഞ്ച്-ഐ.പി.സി.സി.) തന്നെ ചൂണ്ടിക്കാട്ടിയിട്ടുള്ളതാണിത്. സ്ഥിതി ഇതായിരിക്കെ, കാലാവസ്ഥാ വ്യതിയാനത്തെ ചെറുക്കാന്‍ കഴിയുന്നൊരു ഭക്ഷ്യോത്പാദന വ്യവസ്ഥ യാഥാര്‍ഥ്യമാക്കുന്നതിന് അഞ്ചു നിര്‍ദേശങ്ങള്‍ മുന്നോട്ടുവെക്കുന്നു.

1)സുസ്ഥിരവും സുഘടിതവുമായ ഉത്പാദനത്തിലേക്കു നീങ്ങുക

‘ഹരിത വിപ്ലവം’ എന്ന ചെല്ലപ്പേരിലറിയപ്പെടുന്ന വ്യാവസായിക കൃഷി അവതരിപ്പിച്ച കൃത്രിമമായ വേര്‍പിരിക്കലുകളും ലളിതവത്കരണങ്ങളും ഇല്ലാതാക്കേണ്ടതുണ്ട്. സുസ്ഥിര കൃഷിരീതിയുടെ വിവിധ വശങ്ങള്‍ വീണ്ടും ഏകോപിപ്പിക്കണം. കാര്‍ഷിക ജൈവവൈവിധ്യം വീണ്ടും നമ്മുടെ കാര്‍ഷികോത്പാദനത്തിന്റെ മൂലക്കല്ലാവണം. വിത്തു സമാഹരിക്കുന്നതിന്റെയും കൈമാറ്റം ചെയ്യുന്നതിന്റെയും തദ്ദേശീയ സംവിധാനങ്ങള്‍ പുനരാനയിക്കപ്പെടുകയും വേണം. അല്ലാതെ, ഇന്ത്യന്‍ കര്‍ഷകരെ ബഹുരാഷ്ട്രക്കുത്തകകളുടെ അടിമയാക്കുന്ന ജനിതക വിത്തുകളല്ല വേണ്ടത്. രാസവളങ്ങളുടെയും കീടനാശിനികളുടെയും അമിതോപയോഗം അവസാനിപ്പിക്കണം. പകരം, ‘ഹരിത സാങ്കേതികവിദ്യ’ അവതരിപ്പിച്ചു മണ്ണിന്റെ വളക്കുറ് വീണ്ടെടുക്കണം. ഹരിത വിപ്ലവത്തിന്റെ തൊട്ടിലായി അറിയപ്പെടുന്ന പഞ്ചാബ്, ഹരിയാണ, പടിഞ്ഞാറന്‍ ഉത്തര്‍പ്രദേശ് എന്നിവിടങ്ങളിലെ നിലങ്ങള്‍ രാസവളങ്ങളുടെയും കീടനാശിനിയുടെയും അമിതോപയോഗത്തിലൂടെ തരിശായി മാറിയതാണ് അനുഭവം. ഇവയൊന്നും ഉപയോഗിക്കാതെ വിജയകരമായി കൃഷി ചെയ്യുന്നതിനുള്ള തനതുരീതികള്‍ പ്രതിബദ്ധരായ ശാസ്ത്രജ്ഞരും സഹജ വിജ്ഞാനികളായ കര്‍ഷകരും വികസിപ്പിച്ചെടുത്തിട്ടുണ്ട്. കാലാവസ്ഥാ വ്യതിയാനത്തിനിടയാക്കുന്ന ഹരിതഗൃഹ വാതകങ്ങള്‍ കാര്‍ഷിക വൃത്തിയിലൂടെ പുറന്തള്ളപ്പെടുന്നതു പൂര്‍ണമായും ഒഴിവാക്കാന്‍ ഈ രീതികള്‍ അവലംബിച്ചാല്‍ മതി.

2)മണ്ണിനെ തിരിച്ചുപിടിക്കുക

മണ്ണിനെ നാം വീണ്ടും ഗൗരവപൂര്‍വം പരിഗണിക്കാന്‍ തുടങ്ങേണ്ടിയിരിക്കുന്നു. മണ്ണിന്റെ വളക്കൂറ് നഷ്ടമായാല്‍ കൃഷി ഇല്ലാതാവും. വിളകളുണ്ടാവുന്നത് ബാഹ്യാകാശത്തല്ലല്ലോ. നമ്മുടെ മണ്ണിനെ എങ്ങനെ ഫലപ്രദമായി ഉപയോഗിക്കണമെന്നു ഹരിത വിപ്ലവത്തിന്റെ പ്രയോക്താക്കള്‍ക്ക് അറിയില്ലായിരുന്നു. അതുകൊണ്ടാണു ഹരിത വിപ്ലവം പരാജയപ്പെട്ടത്. മണ്ണിന്റെ ജൈവികതയും കാര്‍ബണ്‍ സമതുലിതാവസ്ഥയും വീണ്ടെടുക്കാന്‍ ഇന്ത്യ കഠിനമായ പരിശ്രമം നടത്തേണ്ടിവരും. രാസവളത്തിന്റെ നാലു പതിറ്റാണ്ടായുള്ള അമിതോപയോഗം മൂലം കാര്‍ബണ്‍ സമ്പത്ത് നഷ്ടപ്പെട്ട മണ്ണ് നിര്‍ജീവമായി. ജൈവ കാര്‍ബണ്‍ സമ്പന്നമായ മണ്ണില്‍ അളവറ്റ ജലം സംഭരിക്കാനാവും. അത്തരം മണ്ണില്‍ കൃഷി നടത്തുമ്പോള്‍ ഹരിതഗൃഹ വാതക ബഹിര്‍ഗമനം ഉണ്ടാവുകയുമില്ല.

3)കൃഷിയെ വ്യവസായാധിഷ്ഠിതമല്ലാതാക്കുക

ചെറുകിട, കുടുംബാധിഷ്ഠിത കൃഷി വീണ്ടും ഇന്ത്യന്‍ കാര്‍ഷികോത്പാദന വ്യവസ്ഥയുടെ അടിസ്ഥാന ശിലയാവണം. അന്താരാഷ്ട്ര വിപണികള്‍ക്കു വേണ്ടിയുള്ള കാര്‍ഷികോത്പാദനത്തിനായി സ്ഥാപിതമായ വന്‍കിട വ്യാവസായിക കൃഷിയിടങ്ങള്‍ രാജ്യത്തിന്റെ തനതു ജീവിത രീതികളെയും സംസ്‌കാരങ്ങളെയും നശിപ്പിച്ചു. ഗ്രാമങ്ങളില്‍ വരുമാനോപാധിയില്ലാതായതോടെ ആളുകള്‍ വന്‍തോതില്‍ നഗരങ്ങളിലേക്കു കുടിയേറി. തല്‍ഫലമായി ഗ്രാമങ്ങള്‍ ഏറെക്കുറെ വിജനമാവുകയും നഗരങ്ങള്‍ ജനസംഖ്യാ വിസ്‌ഫോടനത്തോടടുക്കുകയും ചെയ്തു. സുസ്ഥിര കൃഷിയെന്നാല്‍ കാളവണ്ടി യുഗത്തിലേക്കുള്ള തിരിച്ചുപോക്കാണെന്നാണ് നമ്മുടെ കാര്‍ഷിക ഗവേഷണ രംഗത്തെ തമ്പുരാക്കന്‍മാര്‍ കളിയാക്കുന്നത്. ഗോത്ര ജീവിതരീതിയെന്നാണു ബഹുമാന്യനായ ഒരു മന്ത്രിയുടെ പരിഹാസം. അധികാരി വര്‍ഗത്തിന്റെ ധാര്‍ഷ്ട്യമാണിതു കാണിക്കുന്നത്. വ്യാവസായിക കൃഷിയില്‍ വ്യയം ചെയ്യപ്പെടുന്ന അളവറ്റ വൈദ്യുതി ലാഭിക്കാനും സുസ്ഥിര കൃഷിയിലേക്കുള്ള ചുവടുമാറ്റത്തിലൂടെ സാധിക്കും.

4)അന്താരാഷ്ട്ര വാണിജ്യം വേണ്ട

പ്രാദേശിക വിപണികള്‍ക്ക് പ്രാമുഖ്യം നല്‍കുകയെന്നതാണു ഭക്ഷ്യ സ്വയംപര്യാപ്തതയുടെ സുപ്രധാന തത്ത്വങ്ങളിലൊന്ന്. നമ്മുടെ കാര്‍ഷികോത്പന്നങ്ങള്‍ക്കായി അമേരിക്കയുടെയോ യൂറോപ്പിന്റെയോ ജപ്പാന്റെയോ വിപണികള്‍ തേടേണ്ട കാര്യമില്ല. അധികൃതര്‍ മനസ്സുവെച്ചാല്‍ വിപുലമായൊരു ആഭ്യന്തര വിപണി നമുക്കുണ്ടാവും. അതു യാഥാര്‍ഥ്യമാവുന്നപക്ഷം യൂറോപ്യന്‍ യൂണിയന്റെ വിപണിയേക്കാള്‍ വലുതായിരിക്കുമത്. സംസ്ഥാനങ്ങള്‍ക്കിടയില്‍ ഉത്പന്നങ്ങളുടെ സ്വതന്ത്രസഞ്ചാരം തടസ്സപ്പെടുത്തുന്ന കൃത്രിമവേലികള്‍ ഇല്ലാതാക്കണമെന്നു മാത്രം. അന്താരാഷ്ട്ര വിപണിയെയുംഅതിന്റെ അനുബന്ധങ്ങളായ ഭക്ഷ്യ സംസ്‌കരണം, സൂപ്പര്‍ മാര്‍ക്കറ്റുകള്‍ എന്നീ മേഖലകളെയും ലക്ഷ്യമിട്ടുള്ള കാര്‍ഷികോത്പാദനമാണു പരിസ്ഥിതിക്കും കാലാവസ്ഥയ്ക്കും ദോഷകരമാവുന്നത്.

5)മാംസാഹാര വിപണിയുടെ വികേന്ദ്രീകരണം

ഗ്രാമീണ ജീവിതോപാധികളുടെ അവിഭാജ്യ ഭാഗമായിരുന്ന കന്നുകാലി മേഖല ചില വമ്പന്‍ വ്യവസായകുത്തകകളുടെ നിയന്ത്രണത്തിലുള്ള മാംസാഹാര വ്യവസായമായി മാറിയിരിക്കുന്നു. അന്താരാഷ്ട്ര മാംസാഹാര വിപണി കഴിഞ്ഞ ദശകങ്ങളില്‍ അഞ്ചുമടങ്ങാണു വളര്‍ന്നത്. ഇതു കാലാവസ്ഥാ പ്രതിസന്ധിക്കു വലിയ തോതില്‍ വളമായിട്ടുണ്ട്. വാഹനങ്ങളില്‍ നിന്നുള്ള ഹരിതഗൃഹ വാതക ബഹിര്‍ഗമനം 14 ശതമാനമാണെന്നിരിക്കെ, മാംസാഹാര മേഖലയില്‍ നിന്നുള്ളത് 18 ശതമാനമാണ്. കൃഷിയനുബന്ധ ബഹിര്‍ഗമനത്തിന്റെ 80 ശതമാനവും ഈ മേഖലയില്‍ നിന്നു തന്നെ.
ദരിദ്ര രാജ്യങ്ങളിലെ പ്രാദേശിക വിപണികളെ തകര്‍ത്തുകൊണ്ടാണ് അന്താരാഷ്ട്ര മാംസാഹാര വ്യവസായം തഴച്ചുവളര്‍ന്നത്. ഈ ആഗോള മാംസാഹാര വിപണി വികേന്ദ്രീകരിക്കപ്പെടണം. പ്രാദേശിക വിപണിക്ക് ആവശ്യമായ തോതില്‍ മാംസം ചെറുകിട ഫാമുകളില്‍നിന്നു ലഭ്യമാക്കുന്ന സംവിധാനമാണ് അഭികാമ്യം. ഈ രംഗത്തെ അന്താരാഷ്ട്ര കുത്തകകള്‍ ഉത്പാദിപ്പിക്കുന്ന മാംസം ദരിദ്ര രാജ്യങ്ങളിലെ വിപണികളില്‍ വന്നടിയുന്നതിനും അറുതിയുണ്ടാവണം.
കാലാവസ്ഥാ വ്യതിയാനത്തെ ചെറുക്കാന്‍ ശക്തമായ നടപടികളുണ്ടായില്ലെങ്കില്‍ അത് ഇന്ത്യന്‍ കാര്‍ഷിക മേഖലയെയും തദ്വാരാ നമ്മുടെ ഭക്ഷ്യ സുരക്ഷയെയും ബാധിക്കുക തന്നെ ചെയ്യും. ദരിദ്ര ജനവിഭാഗങ്ങളാവും ഇതിന്റെ വിപത്ത് ഏറ്റവുമധികം അനുഭവിക്കേണ്ടിവരിക. കാലാവസ്ഥാ വിപത്ത് ലഘൂകരിക്കുന്നതിനുള്ള നടപടികളുടെ തോതും ഗതിയും നിര്‍ണയിക്കുന്നതു സമ്പന്ന രാജ്യങ്ങളായിരിക്കുമെന്നുള്ള സന്ദേശമാണു കോപന്‍ഹേഗനും കാന്‍കൂണും നല്‍കുന്നത്. ഇതിന്റെ ദൂഷ്യങ്ങള്‍ അനുഭവിക്കുന്നവരുടെ കൂട്ടത്തിലാവും ഇന്ത്യയും മറ്റു വികസ്വര- അല്‍പ്പ വികസിത രാജ്യങ്ങളും. ദുരന്തം ഇങ്ങെത്തും മുമ്പേ രക്ഷാ നടപടികള്‍ക്ക് നാം തുനിയുമോ എന്നതാണ് പ്രസക്തമായ ചോദ്യം.
കടപ്പാട് – മാതൃഭൂമി ലേഖനം 23-01-2010

ഡോ. ആര്‍. ഗോപിമണിയ്ക്ക് ഭ്രാന്താണോ?

ജനുവരി 18, 2011

2011 ജനുവരി 18 ന് മനോരമ ദിനപത്രത്തില്‍ പ്രസിദ്ധീകരിച്ച ഡോ. ആര്‍. ഗോപിമണിയുടെ ലേഖനം.

2000 ഡിസംബറില്‍ ഡോ. ആര്‍ ഗോപിമണി പ്രസിദ്ധീകരിച്ച അക്ഷയകൃഷി എന്ന പുസ്തകം ഡോ. തോമസ് വര്‍ഗീസിന്റെ ആമുഖത്തോടെ ഗംഭീരമായി എഴുതിയിരിക്കുന്നു. 85 രൂപ വിലയ്ക്ക് എന്നെക്കൊണ്ട്  വാങ്ങിപ്പിച്ച അദ്ദേഹം തെങ്ങിന്റെ മഞ്ഞളിപ്പിന് അഞ്ച് കിലോ യൂറിയ തെങ്ങൊന്നിന് ഇടാന്‍ നിര്‍ദ്ദേശിക്കുകയും, പിന്നീട് പ്രസിഷന്‍ ഫാര്‍മിംഗ് എന്ന പ്രചാരകനായി തമിഴ്നാട്ടില്‍ പ്രവര്‍ത്തിക്കകയും ചെയ്തു. ജനറ്റിക് എഞ്ചിനീയറിംഗിനെപ്പറ്റി കാനാ പൂനാ അറിയാത്ത ഇദ്ദേഹത്തിന് ജി.എം വിളകള്‍ കഴിച്ചില്ലെങ്കില്‍ ഭ്രാന്ത് മാറില്ല എന്ന അവസ്ഥയിലാണെന്ന് തോന്നുന്നു.

അക്ഷയകൃഷി

ഇത് ഡോ. ആര്‍. ഗോപിമണിയുടെ വാക്കുകള്‍ പുസ്തകത്തിന്റെ പിന്‍ഭാഗത്ത് ഉള്ളത്.

ഇന്ന് നിലവിലുള്ള രാസികവും ഹിംസാത്മകവുമായ കൃഷിരീതിയില്‍ നിന്നും വ്യത്യസ്തമാണ് അക്ഷയകൃഷി. മണ്ണിന്റെ സ്വാഭാവിക ഫലപുഷ്ടിയെയും ഭൌതിക സ്വഭാവത്തെയും തകിടം മറിക്കാത്തതും പരിസ്ഥിതി സന്തുലനത്തെ പ്രതികൂലമായി ബാധിക്കാത്തതും അന്തരീക്ഷമലിനീകരണത്തിന് വഴിവെയ്ക്കാത്തതും പെട്രോളിയം പോലുള്ള ഊര്‍ജസ്രോതസ്സുകളെ ആശ്രയിക്കാത്തതും പ്രകൃതി നിയമാനുസാരിയായതും സര്‍വ്വോപരി മാനുഷിക  പരിഗണനയ്ക്ക് മുന്‍തൂക്കം നല്‍കുന്നതുമായ കൃഷിയെയാണ് അക്ഷയകൃഷി എന്നുദ്ദേശിക്കുന്നത്. കേരളത്തിലെ കര്‍ഷകരിലും കൃഷിയെ സ്നേഹിക്കുന്നവരിലും പുതിയൊരു കാര്‍ഷിക സംസ്കാരം ഉല്‍ച്ചേര്‍ക്കുക എന്നതാണ് ഈ കൃതിയുടെ ലക്ഷ്യം.

എന്താ ഗോപിമണിസാറെ മേല്‍പ്പറഞ്ഞ താങ്കളുടെ വാക്കുകള്‍ അപ്പാടെ വിഴുങ്ങിയോ ഇപ്പോള്‍.


പലവ്യഞ്ജനങ്ങളല്ല… പല വ്യസനങ്ങള്‍

ജനുവരി 29, 2010

തുണികള്‍ക്കു നിറം ചേര്‍ക്കാനുപയോഗിക്കുന്നതും ക്യാന്‍സര്‍ രോഗത്തിനു കാരണമാകുന്നതുമായ നിരോധിത നിറം മുളകുപൊടിയില്‍, മൂന്നും നാലും രാസവസ്തുക്കൂട്ടുകളുമായി ചായപ്പൊടി, കുട്ടികള്‍ക്കു കൊടുക്കുന്ന ഭക്ഷണത്തില്‍ ഒരിക്കലും ഉള്‍പ്പെടുത്താന്‍ പാടില്ലാത്ത നിറം…

മായക്കാഴ്ചകള്‍ അവസാനിക്കുന്നില്ല. കേരളത്തിന്റെ പൊതുവിപണിയില്‍ നിന്നു മനോരമ സംഘം വാങ്ങി പരിശോധനയ്ക്കു നല്‍കി കിട്ടിയ ഫലങ്ങളും വിവിധ ജില്ലകളില്‍ ഹെല്‍ത്ത് ഇന്‍സ്പെക്ടര്‍മാര്‍ നേരിട്ടു നടത്തിയ പരിശോധനയില്‍ കണ്ടെത്തിയതുമായ വിവരങ്ങളും ഞെട്ടിക്കുന്നത്. ഉപ്പു തൊട്ടു കര്‍പ്പൂരം വരെയുള്ള ഭൂരിഭാഗം വസ്തുക്കളും വിപണിയിലിറക്കുന്നതു മാരകമായ രാസവസ്തുക്കള്‍ ചേര്‍ത്ത്.

മുളകുപൊടിയില്‍
സുഡാന്‍ 4 എന്ന മാരകനിറം കണ്ടെത്തി. ക്യാന്‍സര്‍, കരള്‍, വൃക്കരോഗങ്ങള്‍ എന്നിവയ്ക്കു സാധ്യതയുണ്ടെന്നതിനാല്‍ നിരോധിച്ച നിറമാണിത്. മുളകുപൊടിക്കു ചുവന്നുതുടുത്ത നിറം നല്‍കാനാണു ലാഭക്കൊതിയന്മാര്‍ ഇതു ചേര്‍ത്തിരിക്കുന്നത്. ഇഷ്ടികപ്പൊടി, അറക്കപ്പൊടി എന്നിവ ചേര്‍ത്ത മുളകുപൊടിയും വിപണിയില്‍ സജീവം.

മഞ്ഞനിറം നല്‍കാന്‍ ലെഡ് ക്രോമേറ്റാണു മഞ്ഞപ്പൊടിയില്‍ ചേര്‍ത്തിരിക്കുന്നത്. നല്ല നിറവും സ്വാദം കടുപ്പവും പതയുമുള്ള ചായപ്പൊടി തയാറാക്കാന്‍ സണ്‍സെറ്റ് യെല്ലോ, ടാര്‍ട്രാസിന്‍, കാര്‍മോയ്സിന്‍ എന്നിവയായിരുന്നു മായക്കൂട്ടുകള്‍. നല്ല സുന്ദരക്കുട്ടപ്പന്മാരായി ഉഴുന്നിനെയും ചെറുപയറിനെയും മാറ്റാന്‍ ചേര്‍ത്തതു മുഖത്തിടുന്ന പൌഡറിന്റെ ഘടകമായ ടാല്‍ക്ക്.

എന്നാല്‍,
ലാബ് പരിശോധനയ്ക്കു പോകാതെയും ഞങ്ങള്‍ മായം കണ്ടെത്തി. റവയില്‍ കാന്തം വച്ചുനോക്കിയാല്‍ ഇരുമ്പുതരികള്‍ ചാടിപ്പിടിക്കുന്നു. പഞ്ചസാരയും ഉപ്പും വെള്ളത്തില്‍ അലിയിച്ചപ്പോള്‍ തരിക്കല്ലുകള്‍ ബാക്കി… എത്ര കഠിനഹൃദയരായ ലാഭക്കൊതിയന്മാരാണു നമുക്കു ചുറ്റും!

നല്ലെണ്ണ; നല്ല തവിടെണ്ണ
നല്ലൊന്നാന്തരം ‘നല്ലെണ്ണ. അച്ചാറുണ്ടാക്കാന്‍ അത്യുത്തമം. സന്ധ്യയ്ക്കു വിളക്കു കൊളുത്താനും തേച്ചുകുളിക്കും പേരുകേട്ടത്. പ്രശസ്തമായ ബ്രാന്‍ഡുകളുടെ പകുതി വില. വിലക്കയറ്റംമൂലം പൊറുതിമുട്ടുന്ന സാധാരണക്കാരന് ആനന്ദലബ്ധിക്ക് ഇനിയെന്തു വേണം! പരിശോധിക്കാം ഇൌ വിലക്കുറവിന്റെ സൂത്രവാക്യം.

കേരളവിപണി കയ്യടക്കിക്കൊണ്ടിരിക്കുന്ന തമിഴ്നാട്ടില്‍ നിന്നുള്ള ബ്രാന്‍ഡഡ് നല്ലെണ്ണ കൊച്ചിയിലെ റീജനല്‍ അനലറ്റിക്കല്‍ ലബോറട്ടറിയിലാണു പരിശോധിച്ചത്. പരിശോധനാ റിപ്പോര്‍ട്ടിലെ പ്രസക്തഭാഗം ഇങ്ങനെയായിരുന്നു.

‘എണ്ണയില്‍ മായം കലര്‍ന്നിരിക്കുന്നു. ഭക്ഷ്യവസ്തുക്കളിലെ മായം ചേര്‍ക്കല്‍ നിയമം അനുശാസിക്കുന്ന ഗുണനിലവാരം എണ്ണയ്ക്കില്ല. ഇത്രയും പറഞ്ഞു സര്‍ക്കാര്‍ ലബോറട്ടറി പരിശോധനാ ഫലം പൂര്‍ണമാക്കി. ഇതേ എണ്ണ, ഇതേ ദിവസം ഇൌറോഡിലെ കേന്ദ്ര സര്‍ക്കാര്‍ അംഗീകൃത സ്വകാര്യ ലബോറട്ടറിയില്‍ പരിശോധിച്ചപ്പോള്‍ മായത്തെക്കുറിച്ചുള്ള കൃത്യമായ വിവരം ലഭിച്ചു. പരിശോധനാഫലം ഇങ്ങനെയായിരുന്നു: ‘എണ്ണ ശുദ്ധമല്ല. നല്ലെണ്ണയില്‍ തവിടെണ്ണയുടെ സാന്നിധ്യം സംശയിക്കുന്നു. 90% തവിടെണ്ണയും 10% നല്ലെണ്ണയും എന്ന തോതില്‍.

കുപ്പിയിലും പ്ളാസ്റ്റിക് പൌച്ചിലുമാക്കി പരസ്യം നല്‍കി വില്‍ക്കുന്ന എണ്ണയുടെ ഉള്ളടക്കം ഇങ്ങനെയാണെങ്കില്‍ ചെറുകിട കടകളില്‍ വില്‍ക്കുന്ന എണ്ണയുടെ അവസ്ഥ എന്തായിരിക്കുമെന്ന് ഉൌഹിക്കാവുന്നതേയുള്ളൂ.

വെളിച്ചെണ്ണയില്‍ സര്‍വത്ര മായം
വെളിച്ചെണ്ണയിലുമുണ്ട് വേണ്ടത്ര മായം. രാസവസ്തുക്കള്‍ അടങ്ങിയിട്ടുള്ള മായത്തിനു കച്ചവടക്കാര്‍ സോള്‍വെന്റ് എണ്ണയെന്നു പറയുന്നു. ആട്ടുന്ന കൊപ്രയില്‍ പത്തുശതമാനത്തോളം എണ്ണ വേര്‍പെടുത്താനാവാതെ ശേഷിക്കും. ഇൌ എണ്ണ രാസവസ്തുക്കള്‍ ഉപയോഗിച്ചു വേര്‍പെടുത്തുന്നതാണു സോള്‍വെന്റ് എണ്ണ.

പാം കെര്‍ണല്‍ ഒായില്‍, റബര്‍ക്കുരുവിന്റെ എണ്ണ, പാരഫിന്‍ ഓയില്‍ എന്നിവ വെളിച്ചെണ്ണയിലെ പതിവു മായങ്ങളാണ്. വൃക്കത്തകരാറുകളും ക്യാന്‍സറിനും വരെ കാരണമാകുന്നുണ്ട്, മായം ചേര്‍ത്ത ഭക്ഷ്യഎണ്ണകള്‍. മായമുള്ള എണ്ണ ഉള്ളില്‍ ചെന്നാല്‍ ഛര്‍ദി, വയറിളക്കം, കൈകാലുകളില്‍ നീര്‍ക്കെട്ട് തൊലിപ്പുറത്തു പാടുകള്‍, ഹൃദയമിടിപ്പില്‍ കുറവ് തുടങ്ങിയ പ്രശ്നങ്ങളുണ്ടാകും.

ഹോട്ടലുകളില്‍ ഇറച്ചിയും മറ്റും വറുത്തതിനു ശേഷമുള്ള എണ്ണ ശേഖരിച്ചു ചില രാസവസ്തുക്കള്‍ ചേര്‍ത്തു ചൂടാക്കി അരിച്ച് അല്‍പം നല്ലെണ്ണ മിക്സ് ചെയ്തശേഷം വിളക്കെണ്ണ എന്ന പേരില്‍ ചില കമ്പനിക്കാര്‍ ഇറക്കുന്ന സംഭവം നേരത്തേ സിവില്‍ സപ്ളൈസ് വകുപ്പിന്റെ ശ്രദ്ധയില്‍പ്പെട്ടിരുന്നു. എന്നാല്‍, വിളക്കെണ്ണ ഭക്ഷ്യവസ്തുവല്ലെന്നതിനാല്‍ ഭക്ഷ്യവസ്തു മായംചേര്‍ക്കല്‍ നിരോധന നിയമപ്രകാരം കേസെടുക്കാന്‍ കഴിയില്ല.

തമിഴനെ തട്ടിപ്പുകാരനാക്കുന്ന മലയാളി
തമിഴനെ തട്ടിപ്പിനു നിര്‍ബന്ധിക്കുന്നതു മലയാളിയാണെന്നു കോയമ്പത്തൂരിലെ തരികിട ടീ ബ്ളെന്‍ഡിങ് പരിപാടി നടത്തുന്ന സുന്ദരസ്വാമി പറയുന്നതു കള്ളമാകാന്‍ വഴിയില്ല. നല്ല ചായപ്പൊടി കൊടുത്താല്‍ ഗുണമില്ലെന്നും മണമില്ലെന്നും സ്വാദില്ലെന്നും പറഞ്ഞു മടക്കുന്നവരാണു മലയാളികള്‍. അതുകൊണ്ടു തന്നെ മൂന്നു മുതല്‍ ആറുവരെ രാസവസ്തുക്കള്‍ ചേര്‍ത്ത ചായപ്പൊടിയാണു സ്വാമി കേരളത്തിലെ കടകളിലേക്കു നല്‍കുന്നത്. ഇത്തരം മിക്സിങ് യൂണിറ്റ് കോയമ്പത്തൂര്‍, ചെന്നൈ മേഖലകളില്‍ കുടില്‍വ്യവസായം പോലെയാണ്. നീലഗിരി ജില്ലയില്‍ മായം കലര്‍ത്തി ചായപ്പൊടി നിര്‍മിച്ച ഒന്‍പതു ഫാക്ടറികളാണ് അടുത്തു പൂട്ടിയത്.

മിക്സിങ് ചായപ്പൊടിയുണ്ടാക്കാന്‍ നല്ല പൊടി വേണമെന്നില്ല. ഫാക്ടറികള്‍ ചായപ്പൊടി നിര്‍മിക്കുമ്പോള്‍ ചൂടായി കരിഞ്ഞത്, പകുതിവെന്ത ചായപ്പൊടി എന്നിവയാണു വേണ്ടത്. ഇത്തരം ചായപ്പൊടികള്‍ കുറഞ്ഞ വിലയില്‍ വാങ്ങിയാണു കൃത്രിമം ചേര്‍ക്കുക. നിറമുണ്ടാകാന്‍ എന്തു ചേര്‍ക്കണം, പതയുണ്ടാകാന്‍ എന്തു ചേര്‍ക്കണം, കടുപ്പത്തിന് എന്തു ചേര്‍ക്കണമെന്നെല്ലാം ബ്ളെന്‍ഡര്‍മാര്‍ക്കറിയാം. റെഡ് ഓക്സൈഡ്, സണ്‍സെറ്റ് യെല്ലോ, ടാര്‍ട്രാസിന്‍, കര്‍മോസൈന്‍ എന്നിവയാണു പൊതുവേ ചേര്‍ക്കുന്ന സാധനങ്ങള്‍.

മാംസപ്രിയര്‍ക്കും രക്ഷയില്ല. ശുദ്ധമെന്നു കരുതി വാങ്ങുന്ന ഇറച്ചിയും മീനും ശുദ്ധമല്ലെന്നു വന്നാലോ? ആ മായാജാലത്തെക്കുറിച്ചു തിങ്കളാഴ്ച

കടപ്പാട് – മനോരമ


പച്ചപ്പു പോകും, നമ്മള്‍ കരിയും

ജനുവരി 29, 2010

അറിയുക; രാജ്യാന്തര സമൂഹം നിഷ്കര്‍ഷിക്കുന്ന കീടനാശിനി പരിധിയെക്കാള്‍ 700 ഇരട്ടിയിലേറെ വിഷം കലര്‍ന്ന പച്ചക്കറികള്‍ നിയമ പ്രകാരം തന്നെ ഇന്ത്യയില്‍ വിറ്റഴിക്കാം!

അതായത്, നമ്മള്‍ ദിവസവും കഴിക്കുന്ന പഴങ്ങളിലും പച്ചക്കറികളിലും നിയമ പരിധിക്കുള്ളില്‍ നിന്നുകൊണ്ടു തന്നെ അതിഭീകരമായ തരത്തില്‍ കീടനാശിനി പ്രയോഗം നടക്കുന്നു, ആരും ചോദിക്കാനില്ല! കീടനാശിനികളുടെ അളവ് അനുവദനീയ പരിധിക്കുള്ളിലാണെന്നും ആശങ്കപ്പെടേണ്ടതില്ലെന്നും സര്‍ക്കാര്‍ ഏജന്‍സികള്‍ സാന്ത്വനപ്പെടു ത്തുന്നതിന്റെ ഗുട്ടന്‍സ് കാലഹരണപ്പെട്ട നിയമങ്ങളെ അടിസ്ഥാന പ്പെടുത്തി യാണെന്നു നാം തിരിച്ചറിയണം.

മനോരമ സംഘത്തിന്റെ അന്വേഷണത്തില്‍ കണ്ടെത്തിയത്
കോട്ടയം

ജില്ലയില്‍ നിന്നു മനോരമ സംഘം ശേഖരിച്ച പാവയ്ക്ക സാംപിളുകള്‍ കൊച്ചിയിലെ ലബോറട്ടറിയിലും കേരള കാര്‍ഷിക സര്‍വകലാശാലയുടെ വെള്ളായണി റെസിഡ്യൂ ലാബിലും ഒരേസമയം പരിശോധനയ്ക്കു നല്‍കി. ഒാര്‍ഗാനോ ഫോസ്ഫറസ് ഇനത്തിലുള്ള കീടനാശിനി അതില്‍ കണ്ടെത്തി.

പച്ചക്കറികളില്‍ ഒാര്‍ഗാനോ ക്ളോറിന്‍, ഒാര്‍ഗാനോ ഫോസ്ഫറസ്, സിന്തറ്റിക് പൈറിത്രോയ്ഡ്സ് എന്നിവയുടെ പരിശോധനയാണു നടത്തിയത്. (കേരളത്തിലെമ്പാടും പച്ചക്കറിയെത്തുന്നത് ഒരേ രീതിയില്‍ കൃഷി നടക്കുന്ന ഇടങ്ങളില്‍ നിന്നായതിനാല്‍ നമ്മുടെ ഏതു നാട്ടിന്‍പുറത്തുള്ളവ പരിശോധിച്ചാലും ഫലത്തില്‍ ഏറെയൊന്നും വ്യത്യാസം വരാനില്ല.)

കേന്ദ്ര കൃഷിമന്ത്രാലയത്തിന്റെ അന്വേഷണത്തില്‍ കണ്ടെത്തിയത്
കീടനാശിനികളുടെ അനുവദനീയ പരിധിക്കും (മാക്സിമം റെസിഡ്യൂ ലെവല്‍ അഥവാ എംആര്‍എല്‍) അപ്പുറമാണു പല പച്ചക്കറികളിലുമുള്ള കീടനാശിനി സാന്നിധ്യമെന്നു രാജ്യവ്യാപകമായി നടത്തിയ പരിശോധനയില്‍ വ്യക്തമായി. 18% പച്ചക്കറികളിലും 12% പഴങ്ങളിലും കീടനാശിനി സാന്നിധ്യമുണ്ടെന്നു കണ്ടെത്തി. നാലുശതമാനം പച്ചക്കറികളിലും രണ്ടു ശതമാനം പഴങ്ങളിലും കീടനാശിനി അനുവദനീയ പരിധിക്കു മുകളില്‍.

നിരോധിക്കപ്പെട്ട മാരക കീടനാശിനികളുടെ ഉപയോഗവും പഠനം സ്ഥിരീകരിക്കുന്നു. കാബേജ്, വെണ്ടയ്ക്ക, തക്കാളി, കോളി ഫ്ളവര്‍ എന്നിവയിലാണു താരതമ്യേന വിഷാംശം കൂടുതല്‍. സൈപ്പര്‍മെത്രിന്‍, പ്രൊഫനോഫോസ്, മോണോക്രോട്ടോഫോസ് തുടങ്ങിയ കീടനാശിനികളാണു പഴങ്ങളില്‍ കണ്ടെത്തിയത്. നിരോധിക്കപ്പെട്ട ഡിഡിടി അടക്കമുള്ള വിഷങ്ങളുടെ സാന്നിധ്യവും കണ്ടെത്തിയിട്ടുണ്ട്.

സര്‍വകാലാശാലയുടെ അന്വേഷണത്തില്‍ കണ്ടെത്തിയത്
ഭക്ഷ്യവസ്തുക്കളിലെ കീടനാശിനികളുടെ സാന്നിധ്യം കണ്ടെത്താന്‍ സര്‍വകലാശാലയിലെ ശാസ്ത്രജ്ഞര്‍ 2006 മുതല്‍ പഠനം നടത്തുന്നുണ്ട്. 678 ഭക്ഷ്യസാംപിളുകളാണു 2008ല്‍ ശേഖരിച്ചത്. ഇതില്‍ 26 സാംപിളുകളില്‍ കീടനാശിനികളുടെ സാന്നിധ്യം കണ്ടെത്തി.

കാബേജ്, കോളിഫ്ളവര്‍, തക്കാളി, വഴുതന, വെണ്ട എന്നിവയടക്കം 180 പച്ചക്കറി സാംപിളുകള്‍ പരിശോധിച്ചു. വെണ്ടയുടെ രണ്ടു സാംപിളുകളിലും ഒരു കോളിഫ്ളവര്‍ സാംപിളിലും ഒാര്‍ഗാനോ ഫോസ്ഫറസ് ഇനത്തില്‍പ്പെട്ട കീടനാശിനികളുടെ സാന്നിധ്യം സ്ഥിരീകരിച്ചു.

ആപ്പിള്‍, ഒാറഞ്ച്, വാഴപ്പഴം, മുന്തിരി, മാതള നാരങ്ങ എന്നിവയുടെ 50 സാംപിളുകളും പരിശോധിച്ചു. തിരുവനന്തപുരത്തു നിന്നുള്ള രണ്ടു മുന്തിരി സാംപിളുകളില്‍ ഒാര്‍ഗാനോ ഫോസ്ഫറസ് ഇനത്തിലുള്ള കീടനാശിനികളുടെ സാന്നിധ്യം കണ്ടെത്തി.

ഗോതമ്പിന്റെ നാലു സാംപിളുകളിലും ഇൌ കാലയളവില്‍ ഒാര്‍ഗാനോ ഫോസ്ഫറസ് കീടനാശിനികള്‍ സ്ഥിരീകരിച്ചു. സാംപിളെടുത്ത സുഗന്ധവ്യഞ്ജനങ്ങളില്‍ പകുതിയിലേറെയും കീടനാശിനി കലര്‍ന്നതാണെന്നും കണ്ടെത്തി. 20 സാംപിളെടുത്തതില്‍ 11ലും കീടനാശിനികള്‍ കണ്ടെത്തി. ഒന്നില്‍ അനുവദനീയ പരിധിക്കു മുകളില്‍.

പാലക്കാട് മുതലമടയിലെ മാവിന്‍തോട്ടങ്ങളില്‍ നിരോധിത എന്‍ഡോസള്‍ഫാനു പുറമേ സൈപ്പര്‍മെത്രിന്‍ എന്ന സിന്തറ്റിക് പൈറിത്രോയ്ഡിന്റെ പ്രയോഗം 2007ല്‍ കണ്ടെത്തി.

തമിഴ്നാട്ടിലെ കൃഷിയിടത്തില്‍ നേരിട്ടു കണ്ടതും കേട്ടതും
മലയാളിയുടെ ഇഷ്ടവിഭവമാണു പാവയ്ക്ക എന്ന കയ്പയ്ക്ക. നട്ടു 120 ദിവസം കൊണ്ടു പാവല്‍ക്കൃഷിയില്‍ വിളവെടുപ്പു പൂര്‍ത്തിയാക്കാം. 120 ദിവസത്തിനുള്ളില്‍ 12 തരം മാരകവിഷങ്ങള്‍ 10 ദിവസം ഇടവിട്ടു ചെടിയിലും കായിലും തളിക്കുന്നുവെന്ന് അറിഞ്ഞാലോ… നമുക്കു നീങ്ങാം തമിഴ്നാട്ടിലെ പച്ചക്കറിപ്പാടങ്ങളിലേക്ക്. കേരളത്തിനു സദ്യയൊരുക്കുന്ന കറുത്ത മണ്ണില്‍ കണ്ടതും കേട്ടതുമായ വിശേഷങ്ങള്‍ ഇങ്ങനെയായിരുന്നു. അളവും ഇടവേളകളും സംബന്ധിച്ചു കാര്‍ഷിക ശാസ്ത്രജ്ഞരും കീടനാശിനി ഉല്‍പാദക കമ്പനികളും നല്‍കുന്ന നിര്‍ദേശങ്ങള്‍ കാറ്റില്‍ പറത്തിയാണു മിക്കയിടങ്ങളിലും വിഷപ്രയോഗം.

തൈ നടുന്നു
. പാവല്‍ തൈ വള്ളി വീശിയാലുടന്‍ ‘റോഗര്‍ എന്ന കീടനാശിനി. ഒാര്‍ഗാനോ ഫോസ്ഫറസ് ഇനത്തില്‍പ്പെട്ട ഇതു നീരൂറ്റിക്കുടിക്കുന്ന കീടങ്ങളെ നിശേഷം നശിപ്പിക്കുന്നു.
. 10 ദിവസം കഴിഞ്ഞാല്‍ ‘എക്കാലക്സിന്റെ വരവായി. ഒാര്‍ഗാനോ ഫോസ്ഫറസ് ഇനത്തില്‍പ്പെട്ട ക്വിനാല്‍ഫോസ് എന്ന രാസവസ്തുവാണിത്. കീടങ്ങള്‍ നിശേഷമൊടുങ്ങിയെന്ന് ഉറപ്പിക്കുന്നു.
. ഇതിനിടയില്‍ ഇലകരിച്ചിലോ മറ്റോ കണ്ടാലോ..? പരിഹാരം ഉടനടി. കാര്‍ബമേറ്റ് ഇനത്തില്‍പ്പെട്ട കുമിള്‍നാശിനി ‘ഇന്‍ഡോഫില്‍ രംഗപ്രവേശം ചെയ്യുന്നു. ഇതു മാത്രമായോ ‘റോഗറുമായി കലര്‍ത്തിയോ പ്രയോഗിക്കുന്നു.
. അടുത്ത ഇര പുഴുക്കളാണ്. ഉഗ്രവിഷമായ ഹോസ്റ്റാതിയോണ്‍ തന്നെ ആശ്രയം. ഇതും ഒാര്‍ഗാനോ ഫോസ്ഫറസ് വിഭാഗം തന്നെ.

പൂവിട്ടു
. ദാ വരുന്നു അടുത്തത്..! ‘കോണ്‍ഫിഡോര്‍ എന്നു പേര്. സംഗതി ന്യൂജനറേഷന്‍. വീര്യമേറും. ഇമിഡാക്രോപ്പിഡ് എന്നു ശാസ്ത്രീയമായി പറയും. കുരുടിപ്പിനും നീരൂറ്റും കീടങ്ങള്‍ക്കും എതിരെയുള്ള വജ്രായുധം.
. ഇലകരിച്ചില്‍ കണ്ടാലും ഇല്ലെങ്കിലും വന്‍കിട കര്‍ഷകര്‍ പ്രയോഗിക്കുന്ന ഒരു പുതുതലമറ കീടനാശിനിയുണ്ട്. ഹെക്സാകൊണാസോള്‍ ഇനത്തില്‍പ്പെട്ട ‘കോണ്‍ടാഫ് പ്ളസ്.

പുഷ്പിണിയായി
. കായ്കള്‍ക്കൊപ്പം ഇൌച്ചകളുമെത്തിയേക്കാം. ചിലര്‍ക്കിഷ്ടം തീവ്രമായ ‘സെവിന്‍ മറ്റുചിലര്‍ പ്രയോഗിക്കുന്നത് ഒാര്‍ഗാനോ ഫോസ്ഫറസ് വിഭാഗത്തില്‍ തന്നെയുള്ള ‘ഫോസ്കില്‍.
. അടങ്ങുമോ കായീച്ച അത്രപെട്ടെന്ന്. കണ്ടാല്‍ ഉമ്മ വയ്ക്കാന്‍ തോന്നുന്ന ഭംഗിയേറിയ പാവയ്ക്ക തന്നെ വേണ്ടേ… അതിനു വേണം ‘കരാട്ടെ. സിന്തറ്റിക് പൈറിത്രോയ്ഡ് ഇനത്തില്‍പ്പെട്ട ഉഗ്രസാധനം.
. ദാ, വരുന്നു അടുത്ത പ്രശ്നം… മൊസൈക്ക് രോഗം. വിളവെങ്ങാനും കുറഞ്ഞാലോ. ആവാം അടുത്ത ന്യൂജനറേഷന്‍ സാധനം. ഫ്ളൂബെന്‍ഡാമൈഡ് ഇനത്തില്‍പ്പെടുന്ന ‘ഫേം, ടാക്കുമി ഇവയില്‍ ഏതെങ്കിലും ആവാം.
. കൂടുതല്‍ കായ് പിടിപ്പിക്കാന്‍ ഇതിനിടയില്‍ ഹോര്‍മോണ്‍ പ്രയോഗവുമുണ്ടാകും.
. പുഴുക്കള്‍ക്കെതിരെ ‘റീവ എന്ന സിന്തറ്റിക് പൈറിത്രോയ്ഡ് പ്രയോഗിക്കുന്നു.
. സുന്ദരി പാവയ്ക്കകള്‍ക്ക് ഒന്നുകൂടി ‘നഗാട്ട- സൈപ്പര്‍മെത്രിന്‍ അടങ്ങിയ കീടനാശിനി.

ചുരുക്കത്തില്‍ 120 ദിവസം, പത്തുദിവസത്തിന്റെ ഇടവേളകളില്‍ 12 വിഷങ്ങള്‍. വിളയെ കീടത്തില്‍ നിന്നു രക്ഷിക്കാന്‍ കീടനാശിനി വേണം. അംഗീകൃത കീടനാശിനി, അംഗീകൃത ഇടവേളകളില്‍, അംഗീകൃത അളവില്‍ മാത്രം പ്രയോഗിച്ചാല്‍ ദോഷഫലങ്ങള്‍ കുറഞ്ഞിരിക്കും. അമിത ലാഭത്തിനു വേണ്ടി ഇതെല്ലാം മറക്കുമ്പോള്‍ വിള വിഷലിപ്തമാകുന്നുവെന്നു കൃഷിശാസ്ത്രജ്ഞര്‍.

എന്തായാലും പച്ചക്കറി വാങ്ങാതിരിക്കാനാവില്ല. അപ്പോള്‍ പിന്നെ അരിയും പലവ്യഞ്ജനങ്ങളും കൂടി വാങ്ങാമെന്നു കരുതിയാലോ… അതിലെ മായത്തെക്കുറിച്ചു നാളെ.

കടപ്പാട് – മനോരമ


Follow

Get every new post delivered to your Inbox.